بسم الله الرحمن الرحيم
شلونكم جميعا
حياكم الله كلكم بموضوعي اليديد وان شا الله يعجبكم
موضوعي أبيكم فيه تتخيلون معاي مستقبلنا بعد 30 40 50 سنة ان شا الله اذا الله احيانا شلون راح تكون حياتنا ،
كل ما قعد ابوي ربي يحفظه يكلمني عن الكويت وشلون كانت وشنو الكلمات اللي كانوا يتكلمونها واندثرت الحين،
وكل ما قعد ابوي يلومنا لما نسمع كلامه مال اول ونسأله : يبا شنو يعني ؟ ويلومنا ليش ما نعرف مع انه هذي ثقافة ديرتنا ،
أتخيل شلون راح نكون لما نكون بموقف أبوي ،
أفكر شنو الكلمات اللي احنا الحين نقولها وراح تندثر ،
أتخيل شلون أنه التمدن اللي احنا فيه باجر راح يكون قديم ،
اسرح وأفكر أقول شلون أيامنا هذي باجر راح تصير تراث ...
أدري أنه هذي سنة الحياة ، وكل جيل يلوم الجيل اللي ايي وراه ،
كل جيل يعتقد انه أيامه احلى من الجيل الجديد .
خلونا نتخيل ونعيش الجو شوي
تخيلوا معاي بعد 50 سنة واحنا كبرنا وصاروا ينادونا ( عمي ) ( يدي ) ( أبوي العود )
( خالتي ) ( يمه ) ( أمي العودة ) ،
تخيلوا واحنا بهالقعدة وعيالنا حوالينا ، وطرحوا مسابقات ، نتعرف فيها على مسميات قبل ،
وكانوا عيالنا يسئلونا ويطلبون منا انه احنا نغششهم عشان يجاوبون صح .
تخيلوا اللي يقول المسابقة يسئل :
انا بقول لكم كلمات كانوا أجدادنا يستخدمونها والحين اندثرت ،
كلمة ( ليقنق ) : ونجاوب عليهم : هذا شي كانوا بناتنا يلبسونه ضيج وكان فيه منه كل الألوان .
( برمودا ) بنطرون يوصل لما الركبة ويلبسونه البنات والصبيان .
( الآي بود ) جهاز كنا نخزن فيه أصوات وصور , وفيه منه ألوان بعد .
( الشوارفسكي ) شي يلمع نزين فيه كل شي سواء ملابس أو ساعات حتى الأكواب والأجهزة والسيارات .
( اي شي ) لفظ نقوله حق كل شي ما يعجبنا .
( مليق ) لفظ نطلقه على شي سخيف .
( الأفنيوز ) سوقنا مال قبل كان شكبره عندنا وكنا نستانس عليه وكل شي فيه ، وكان كله زحمة ، حتى كان فيه مكان اسمه ( بروي ) كله نخلي عيالنا يلعبون فيه ، وفيه مطاعم وسينما .
( هوت دوج ) أكله كنا ناكلها أصلها أمريكي ، وكانوا عيالنا متفخين بسبتها ، بس كانوا عندنا متفخين بس أضعف منكم الحين مو مثلكم ، بس حلوة .
( قوتشي، فندي ، برادا ، كوتش ) اسماء ماركات كنا حدددنا هابين فيها ، وكان في منها اصلي وتقليد ، وكنا نعيب على اللي يشترون تقليد ، وكان عندنا اللي كله تشتري ماركة بماركة هذي حددها كشخة ، صج أيااااام .
( بوية ، بويات ) بنات كانوا يقلدون الرياييل ويسوون قروبات ويحلقون شعورهم بموس ،وكله يفصلونهم من المدرسة .
( أبلة ) كلمة كانت تنقال حق اللي يدرسنا ، كان ما عندنا مثلكم جذي ، كنا نروح المدرسة كل يوم ونقعد طول النهار هناك لما الغدا ، وكان ايي شخص يدرسنا ، مو مثلكم الحين كله بالإلكترونيات ، كانوا حريمنا أكثر شي يصيرون مدرسات حتى الرياييل أذكر كانوا يبون يتزوجون الابلة عشان معاشها
( الميكروويف ) مثل شي مربع كنا نحط فيه الأكل ويحرره وبسرعة يخلص ، ويي قبل عبالنا شي ، وكان كل مطبخ فيه منه ، ويي ذكريااات .
( البلاي ستيشن ) وييي شخباري ، هذي ألعابنا قبل ، كان ما فيه ياهل ما عنده هاللعبة ، كنا كلنا نتيمع ونلعبها ونقعد بالساعات ، بس صج وناسة مو مثل ألعابكم الحين
( البي أس بي ) هذي تيي نفس البلاي ستيشن بس على أصغر ، لا بعد كان في منها ألوااان ، كنا نتهاوش عليها .
(الميك أب ) ألوان كانوا الحريم يحطونها بوييوهم ، وكانوا شحلللوهم ، وي أذكر اللي ما تحط كانت تخرررع خصوصا اللي توها قاعدة من النوم .
( حجاب بو تفخة ) اييي شخباري ، هذي حركة هبوا فيها بعض بنات قبل ، كانوا يحطون شي فوق راسهم عشان يصير كبير ، كانت الوحدة تمشي جنه عندها راسين .
( المكنسة ) مكينة كااانت حددددها مزعجة لما يشغلونها تصك الراس كنا ننظف فيها بيتنا .
( الأوتي ) آلة كانت تعدل هدومنا عقب ما نغسلها كانت حارة ويي أذكر شكثر خربت هدومنا .
( الماسنجر ) مثل برنامج كنا نسولف فيه بالكتابة ويصير بعد نشوف ونسمع ، كاان شغل عدل .
( غبرة ) كلمة نقولها حق الشخص اللي من زمان مو شايفينه , يقولون له ، وييي أنت غبرة ، وين طالع .
( أصانصير ) شي كان يوديك فوق وينزلك تحت ، مثل باب تبطله وترعص رقم الطابق اللي تبي تروح له ، وي أذكر اليهال قبل يستانسون عليه كلله يلعبون فيه . حتى بيوتنا كان فيه منه .
( الفليت ) شي كنا نرشه نموت الحشرات ، قبل بيووتنا كانت مو مثل بيوتكم الحين ، قبل يطلع لنا زهيوي ذبان .
( لووول ) كلمة نكتبها لما نضحك عشان اللي يقراها يدري انه احنا قاعدين نضحك .
( الجريدة ) أوراق كان فيها اخبار ، كانوا يحطونها عند باب بيتنا كل يوم الفير ، ولازم نقراها قبل ، اي واذكر بعد اكثر اخبارها كانت مو صحيحة .
( كول ) كلمة نقولها حق الصبيان اللي ماشين على الموضة .
( سبايكي ) هذي حركة هم الصبيان كانوا يسوونها بشعورهم كانوا يوقفونها ويحطون فيها شي دبق كنا نسميه ( جل ) .
( بلوتوث ) شغلة كانت موجوده تلفونات قبل كنا ندز فيها فايلات ببلاش من غير فلوس . .
( جات ) شغلة كانت موجودة بالنت كان الناس يسولفون من خلالها .
( طااف ) كلمة نقولها حق الشخص أو الشي اللي باط جبدنا وما نبي نعبره .
( سكيب ) نفس طاف تقريبا ، يعني ما تعبر الشي ، مثلا تقول انا مسكب بفلان .
ويي يا عيالي ذكرتوني بسوالف قبل .
هذا جيلنا ، مهما كان أرحم وأبرئ من جيلكم .
ها تخيلتوا معاي ؟
شرايكم باللي تخيلتوه ؟
الله يستر من اللي ياي صح ؟
اتمنى انكم تكونون استمتعتوا بموضوعي ، وان شا الله كان خفيف عليكم .
وشاكرة لكم مروركم .
من كتابات اختكم :شيخة العرب
ليست هناك تعليقات:
إرسال تعليق