التنفس ممنوع @__@

سم الله الرحمن الرحيم

السلام عليكم ورحمة الله

كيف الأحوال ؟؟ وايش الأخبار ؟؟


اخواني .. خواتي ..


مسكينة أجيالنا العربية ، ومساكين عيال هذه الاجيال ، فمن أول ما يدشون المدرسة وأهم بمعسكر .. يحاسبون الطفل حتى على الوقفة .. إن تحرك شوي انهالت عليه الأوامر والتعليمات .. لستة الممنوعات أطول ب10 أمتار من المسموحات

المدرسة عندها جل غااايتها بالصف اهو السكوووت وعدم الحراك ..

مع انهم ما يدرون انه ادارة الصف اهي وسيلة ماهي غاية ..

اكيد كلكم مثلي شبعتوا وانتوا تسمعون هالكلمة بالصف :

(( مابي نفس ))

حتى انفاسنا ما يبون يسمعونها ..

نعيش في مجتمع يملي علينا شنو لازم نسوي ..

صرنا آلة كمبيوتر ، يدخلون بمخوخنا الفلاش ميموري ، ويطبعون النتايج من الكلام اللي نقوله ..

عطلوا عقولنا .. وقفوا تفكيرنا ..

صرنا مجرد كاسكوات تردد كلام المدرسة ..

اذا حسينا نبي نعترض .. أو فيه شي مو راضي يدش مخنا .. رفعنا ايدنا نبي نسئل .. قالت لنا الأبلة رجاء ما ابي اسئلة بغير المنهج ..

وان صارت المدرسة سمحة وخلتنا نسئل ، وشافتنا معارضين رايها عصبت وصارخت وودتنا عند الناظرة وقالت هذي البنت تقصد التشويش في الحصة ، واتهمتها انه اسئلتها اهي بس عشان تضيع الحصة ..


يعيشوونا بارهاب ..


صرنا ناس تطبق اي شي ينملي علينا ..

افتقدنا الى شي مهم جداااا ، الا وهو الحس الناقد ، التفكير الناقد ..


اي شي نسلم فيه ونقول سمعنا واطعنا ..

ما نحاول ننقد .. :yell:

قبل يومين كنت قاعدة بدورة علمية ..

التفت حق شي حصل اهو اللي نبهني وخلاني اكتب هالموضوع ..

اطالع الدارسات اللي معاي (( طبعا كلهم مدرسات )) عسى ما الدكتور كتب شي على اللوحة يكتبونه ، بشكل لا ارادي .. من غير لا يفهمون شلي بيكتبه ..

بس ياخذ القلم ويخط على السبورة التفت على اللي حوالي اشوفهم يكتبون ..

اذا خط على اللوح خطوا ..

كان قاعد يشرح قاعدة فما كتبها على اللوح ، بس رسم مربع وطالع منه خط بسسس

اشوف الابلات ارسموا مربع وطلعوا منه خط !!

الدكتور كان قاعد يستخدم السكيتشات اللي اوراق بيضه تستخدم احيانا مكان السبورة ، قلب الصفحة ، والله من غير مبالغة ، التفت على اللي قاعدين حوالي اشوفهم قلبوا الصفحة مالت النوتة عندهم :surprised2:


استغربت !!

صرنا بس نطبق اللي يملى علينا ..

لا اراديا ولا شعوريا ومن عقولنا الباطنة نقلد ..


انا اشوف انه ضروري ضروري ضروري تضاف الى المناهج موضوع (( التفكير الناقد ))

وضروري بعد .. يغيرون وسائل التدريس ..

المدارس النموذجية ما يجبرون الطالب بقعدة معينة بالصف .. خصوصا حق الطلبة اللي بسن الابتدائي ..

اخوي لما كان عمره 6 سنين اول سنة له بالمدرسة قام من كرسيه .. بس قام من غير لا يتكلم ولا يصارخ ولا يقول اي حرف ..

شسوى المدرس المربي ؟؟!!

قام وطراق على ويهه ، اللي علم على ويهه !!!!!!!!!!!!!!!!!!!

هذا اول موقف صار له بالمدرسة ...


نبي نبعد الأسلوب التسلطي بالتدريس ..

لأنه الحين قاعدة تطلع نتاييجه علينا ..

مثال المدرسات اكبر دليل !!

حتى بالمنتديات .. مرات وايدة نشوف انفسنا ما نحاول نعقب ولا ننقد ولا نبدي راينا نكتفي بس بمشكور ..


ومشكووورين على مروركم

أختكم الناقدة : شيخة العرب