بسم الله الرحمن الرحيم 
اليوم صار لي موقف بالدوام هزني هز ..
لا حول ولا قوة إلا بالله !!
في البداية بسئلكم : تعرفون ما هي ( المكوس ) ؟؟
ما راح أجاوب الحين بجاوب في نهاية موضوعي …
اليوم صعقت بخبر وفاة احدى العاملات عندنا بالدوام ،
اهي كانت نشيطة وتشتغل عندنا ،
طبيعة العاملات عندنا يشتغلون مشاغل مضاااعفة ،
وفوق هذا مساكين ما يحصلون معاشاتهم ، يعني بعد 3 أشهر 4 اشهر يالله يحصلون معااش شهر ،
مرة سألت احدى العاملات عن ساعات العمل اللي يشتغلونها باليوم ؛ صدمتني صراحة ، اكتشفت انه دوامها من 4 الفجر الى 8 مساء ، يعني يومها كله بالدوام ولما ترد البيت يمكن يمديها تاكل ويمكن لا .
مو هذا موضوعي ..
انا موضوعي عن العاملة اللي توفت عندنا ،
يوم الخميس الماضي واهي بشغلها حست بتعب ، ودوها المستشفى طلع انه المرأة محتاجة الى عملية سريعة للحفاظ على حياتها ،
انا فاجئتني ردة فعل المستشفى ؛ قالوا لها اول لازم تدفع 150 دينار علشان العملية ،
المرأة مسكينة وما عندها فلووس واهي بين الحياة والموت ،
اهي معاشها ما يوصل 20 دينار !! واهي بحالة ما تسمح انهم يساومون فيها على الفلوس ،
بعد ساعات قليلة لفظت هذه المرأة العاملة انفاسها ،
صح هذا يومها ، لكن المستشفى مقصرة في تعاملها معاها .
ليش العاملين والعاملات يعاملونهم على انهم مو بشر ؟؟
ليش الى هذه الدرجة ارواحهم رخيصة ؟؟
ليش ما يدافعون عنهم ؟؟
اهي انسانة فقرها خلاها تضطر انها تترك بيتها وعيالها وتقطع هالاميال وتيي تشتغل عندنا وتتحمل الإهانات ..
لا حول ولا قوة إلا بالله العلي العظيم .
ضرائب .. ضرائب .. ضرائب
وين ما نروح ضرائب .
حسبنا الله ونعم الوكيل .
نسيت ان اخبركم انه المكوس هي الضرائب
هذا كان موضوعي واعذروني على الأسلوب بس صراحة متضايقة .
ليست هناك تعليقات:
إرسال تعليق